عرض. طارق عتريس أبو حطب
اصبري
اياكي يوم تستعجلي
لَ الدنيا تسرق حلمنا
قومي يلّا وكمّلي..
عارف كتافِك تعبانين
لجل اللي بينا اتحملي
لجل اما نوصل للخلاص
لجل اما يبقى البيت شديد
ثبّتي صح الأساس
وسط الطريق هتلاقي ناس
كارهين يا غاليه اسمنا
حاسبي لا غلة حُبنا
قبل الحصاد تصبح مداس
حافظي على سر الهوى
هاتي ابره وهاتي خيط
واشبكي الاتنين سوا
ومن كل قصه ف التراث
فصّلي ل قلبي وقلبِك
هدمتين نفس المقاس
بَرد الطريق
أصعب يا روحي م الرصاص
والحر ناوي يدوّقِك من حزنه كاس
مِدّي ايدِك، حُبي جنبِك
أروى قلبي، واروي قلبِك
أروى قلب الصحرا نيل
الغي كلمة مستحيل!
كوني صوره للجَمال
كوني حِكمة كل دهر
كوني اصلب م الجبال
اسرقي م الغربه مهر
ابعدي عن أي بحر
لَ الملح يفسد تمرنا
قرّبنا نمسك حلمنا
ونعيش معاه ضحكته
كل الحكايه خطوتين
امشي الطريق ل اخرتُه