عرض. طارق أبو حطب
لأول مره كامل
هادي هدوء البحر لمّا يمثل انه النيل
هادي هدوء السحر
وقت ما اندس ف دوا لعليل
هدوء قتيل
والحرب لسه مكمله حواليه
هادي عشان ..
مافيش كلام يتقال ف حرب
ومافيش جِبال هتطير ف سِرب
ولا فيه إشرب يحزِّم الأحزان ف ترقص
ف اخترت انا الكِتمان رصاص للضرب
هادي..
ولو مابقيتش هادي هيجرى إيه؟
مافيش صِراخ م القبر نسمع بيه
ولا عمر دمع الشمع هيطفيه
ومافيش يا دمع خدود تِنَبِّت م البُكا
ف يفيد بإيه الدمع؟
آه هيفيد بإيه
هادي هدوء السبع مستني الفريسه
وعشان ماليش ف السهل والصيده الرخيصه
قاعد حبيس الفِكره وهويس للهزايم
قاعد لوحدي
بس مش مضطر
عمّال بغني من العطش ف الحر
"لكن مانيش هشرب يا صيفي"
غير لما كيفي ف الشتا يشتر
هادي هدوء الحُر ف الزنزانه
وهدوء كلامي الكدب ف حالات الرزانه
وهدوء حبيبتي وهي ندمانه
لكن ماحستهاش
هادي هدوء الحاجات البلاش من إيد لإيد
حاجات مالهاش تقول انا فين
وتقول بكام
ولا ليها وقت ف زحام الحزن والتنهيد
هادي كما الاناشيد ف بلاد ماهيش هاديه
وهدوئي لما بغني مع شاديه
"قولوا لعين الشمس ماتحماشي"
قولوا لعين الشمس
مين ال ماشي ومين هنا مامشيش
وانا لسه هادي ف كل لحظة طيش
أمشي ويمشوا اتفرفط التحويش
وانا قلبي عمرُه ف يوم ما هينادي
هادي لعل هدوئي يبقى الحل
وارسمني لوحه تكون خفيفة الظِل
أتشل ف الصمت ال بيساعني
ولا اطير بنص جناح بدون ما اوصل
هادي كما الشاش اللي فوق الجرح
والدم ثاير شرح ف الموضوع
هادي وغير مهتم بالاحداث
والثوره ف الميداين بتنشل دم
بتنشل ناس
والناس بتجري من وللاشيء
والحزن مركب كلنا ركبناه
بنزُق بعض عشان هنفرح بيه
الحزن أول ملامح تثبت انك كبرت
ناضج
وصاحب سِرك
مؤمن
ومَرمي بشِرك
تايه
كما الأيام
هادي كأنك نمت
الصمت
نازل زن
وآهات يا صاحبي فشِنك
وعشان كده هادي
هادي كما الافيال
وف كل وقت جدال
تلاقيني انا استسلمت
وأديني انا دلوقت
نازل أعِد ف هزايم
وطالع هرَب م الهزايم
بنيت كام هرم وانت نايم ؟
ولسه الغنايم مجرّد خيال