نشوي مصطفى تحكي قصة انسانية الفنان هشام سليم
كتب عمر مغيب
الخير دائما يعيش في النور حتى وإن غاب صاحبه أو رحل بلا عوده يظل الخير يذكره في كل وقت وفي كل حين وهذا اجر الدنيا اما اجر الاخره فهو عند الله.
قصة الفنانة التي طلبت من هشام سليم تأشيرة حج وإليكم القصة كامله من الفنانه نشوي مصطفى.
كتبت: الفنانة نشوى مصطفى "افتكرت حاجة عن هشام سليم يمكن مش كتير يعرفوها — فى يوم راجعة من التصوير وكان فيها استاذة ممثلة كبيرة الله يرحمها اسمها ثريا ابراهيم - قالت لى نشوى معنديش عربية توصلينى فى طريقك لاقرب مكان انزل اخد تاكسى — قلت لها تاكسى ازاي حاوصل حضرتك لباب البيت — واحنا ماشيين قالت لى عارفة الشقة اللي حتوصلينى ليها دى مين جابهالى — قلت لها مين ؟؟ قالت لى شيريهان — وحكت لى انها كانت بتشتغل معاها مسرحية شارع محمد على وكانت بتيجى كل يوم من طنطا للقاهرة وترجع تانى لان بيتها كان هناك ولما شريهان عرفت قالت لها شوفى الشقة اللي تحبيها وانا حاشتريها لك — ولما اشترتها كانت فرحانة اوى — ولما هشام عرف بارك لها وقال لها فرشتيها ولا لسه قالت له فرشتها قال لها كان نفسى افرشها لك قالت له وهى بتهزر طيب ما تعمل حاجة تانية قال لها تحت امرك — قالت له نفسى احج — تانى يوم لقت شركة سياحة بتكلمها وبلغتها ان هشام دفع كامل التكلفة وكانت خمسين الف جنيه وكمان وهى رايحة عطاها مصروف الرحلة وقال لها ادعى لى — بس كده — الف رحمة ونور"